***
अचानक लाजणे.. हसणे तुझे मी पाहतो आहे
खळी खुलवत हसू फुलणे तुझे मी पाहतो आहे
फुलांच्या पाकळ्या कोमल तसे हे ओठ मधुवंती
तशातच गीत पुटपुटणे, तुझे मी पाहतो आहे
कसा मी तोल सांभाळू, तुझे लावण्य की मदिरा?
कहर वर.. लाघवी रुसणे, तुझे मी पाहतो आहे
वयाचा दोष आहे हा तुझा नाही, तुझा नाही
सतत स्वप्नांत वावरणे, तुझे मी पाहतो आहे
नको पाहूस त्याला तू, तुला छळतोय जर दर्पण?
पहाता मुग्ध ब‍ावरणे, तुझे मी पाहतो आहे
किती सांगू तुला आहे तुझ्या प्रेमामध्ये वेडा
कसे छळते मला छळणे तुझे मी पाहतो आहे
कसे शब्दांत बांधावे तुझे सौंदर्य मोहकसे
रुपाच्या पैल ते असणे तुझे मी पाहतो आहे
~ अभिजीत काळे.
१० ऑगस्ट २०२२
No comments:
Post a Comment