***
अनेक योनी फिरून सुद्धा जीव उपाशी असतो का?
म्हणून मानव मनाबरोबर स्वैर कुठेही फिरतो का?
तटस्थतेने अंतरातले द्वंद्व स्वतःच्या बघताना
हळवा, कठोर वा चिंतनपर पिंड आपला घडतो का?
अनुभव, प्रचिती अन् धैर्यावर निर्भर असते परिस्थिती
तो दुःखाचा सागर गिळतो वा डबक्यातच सडतो का?
एक काळजी, एकच चिंता, एकच दुखणे सत‍ावते
प्रत्येकाला पडण्यासाठी एकच धक्का पुरतो का?
मला माहिती हवे जरासे मेल्यानंतरचे जीवन
म्हणून कोणी मरण्याआधी सराव त्याचा करतो का?
किती कळाले जीवन कळते निरिक्षणाने साध्याश्या
प्रेम, प्रतिक्षा, संकट, आशा यांनी माणूस रडतो का?
असेल ती वा असेल तो ही असो कुणीही अपराधी
कधी स्वतःच्या नजरेमध्ये आपण दोषी ठरतो का?
प्रश्नांचे मोहोळ घेउनी फिरता फिरता एक दिवस
शून्य अवस्था प्राप्त होउनी बुद्ध मनाशी जडतो का?
- अभिजीत काळे.
९ मार्च २०२०
