***
माणसाच्या मागण्यांची कीव येते.
लाळघोट्या वासनांची कीव येते.
आंधळे मातृत्व होते कौरवांचे.
बोलती त्या डोळसांची कीव येते.
जिद्द कुठुनी आणते लढण्यास मुंगी!
जीवघेण्या वादळांची कीव येते.
ओल मायेची कळाली पेटल्यावर.
वाळलेल्या लाकडांची कीव येते.
खेळ करते इश्कबाजीचा जवानी.
खेळ झाल्या प्रेमिकांची कीव येते.
ऐकली मी पाखरांची काल किलबिल.
लंगड्या, हरल्या मनांची कीव येते.
जो मनोव्यापार करते नीच बुद्धी
त्या अधाशी कामनांची कीव येते.
-अभिजीत काळे.
३० जून २०१९.
No comments:
Post a Comment