***
याच साठी ते मला म्हटले समंजस.
फक्त सोसत राहिलो, धरला न आकस.
आठवत बसतो सुगीचे ते दिवस मी.
तो हिवाळा, चूल, शेकोटी नि खरवस.
मित्र आणिक बायको या दोन व्यक्ती.
पाहिल्या कोणी चुलत, सावत्र, मावस?
चोरुनी नेलेस ना सर्वस्व माझे?
समजलो होतो तुला मी.. फार सालस!
खाटकाला ते कसे विकलेस करडू?
काल तू म्हटलेस ज्याला.. खूप लोभस!
तू कितीही सत्यवादी म्हण स्वतःला.
बोलतो आहेस तू खोटे निखालस.
काल जे केलेस तुकडे तू मनाचे,
आज त्यांचे ऐक दुखणे, ये जवळ बस.
ती खरा श्रृंगार तारुण्यात करते.
वासनेला काय कळते बाल्य गोंडस?
खेळ का केलास आयुष्या स्वतःचा?
मी निरागस, तू निरागस, ती निरागस!
- अभिजीत काळे.
९ डिसेंबर २०१९.
No comments:
Post a Comment