***
आल्याप्रमाणे जायला राजीच नसतो जीव हा?
संपायचे ठरवूनही कोठे अडकतो जीव हा?
केलास माझा खेळ तू अन् खांबसूत्री बाहुले.
चक्रातुनी सुटण्यास या आता तरसतो जीव हा.
मी फेडले देणे तुझे तू सोड आता बंधने.
ऋण फेडुनी देहा तुझ्या ताब्यात असतो जीव हा.
मृतप्राय जर जगणे इथे, त्याला म्हणावे का जिणे?
जगण्यापरी मरणास की सन्मित्र करतो जीव हा.
उपकार त्यांचे फार जे आजन्म छळ करती तुझा
त्यांच्यामुळे तर विश्व हे सोडून निघतो जीव हा.
आयुष्यभर जळतोस तू सूर्याप्रमाणे माणसा.
अंधार मृत्यूच्या सवे होऊन जळतो जीव हा.
अनिवार्य असते जीवनी सुखदुःख भोगत राहणे.
मोहात गुंतत जाउनी अत्यंत फसतो जीव हा.
- अभिजीत काळे.
२८ ऑक्टोबर २०१९.
No comments:
Post a Comment