***
आठवतो का पहिला पाऊस ?
..आठवते का पहिली हुरहुर ?
आठवती का भिजलेले क्षण ?
..चिंब मनांची ओली थरथर ?
आठवतो का बहर सुखाचा,
..गालांवरची मिश्कील खोडी ?
आठवते का साखरभरली
..अधरभेटीची अवीट गोडी ?
आठवतो का अजून तुजला
..तो आंब्याचा मोहोर राणी ?
आठवती का कानी माझ्या
..तू गुणगुणली मंजुळ गाणी?
आठवतो का गोड शहारा!
..सर्वांगातून शिरशिरणारा ?
आठवतो का अधीर वारा
..गूढ, अनामिक शिवशिवणारा ?
आठवते का सलज्ज किणकिण,
..तुझ्या बिल्वरी साजचुड्याची ?
आठवते का गंधीत तगमग
..फुलाप्रमाणे दरवळण्याची ?
नकोत आठव कातरवेळी
गालांवरती ओघळणारे.
नकळत फसवून मनास हळव्या
.. खुळ्या जीवाला छळणारे.
- अभिजीत काळे.
३ ऑक्टोबर २०१९.
No comments:
Post a Comment