निराकार

न था कुछ तो ख़ुदा था कुछ न होता तो ख़ुदा होता 

डुबोया मुझ को होने ने न होता मैं तो क्या होता 

                   - मिर्जा असदुल्लाखाँ गालिब.

तुझ्या माझ्यात असणार्‍या मला विसरेन मी केव्हा?

तुझ्या माझ्यात सामायिक तुला शोधेन मी केव्हा?

इथे काहीच नव्हते अन् इथे नसणार काहीही

तरी असणार ते कायम तुला समजेन मी केव्हा?

कुणी अस्पृश्य ना येथे कुणी अश्रद्धही नाही

कह्यातुन भेदभावाच्या परी निसटेन मी केव्हा?

नभी ब्रह्मांडगोळाच्या, अणूच्या केंद्रकामध्ये

असे कोंदाटली उर्जा तुला उमजेन मी केव्हा?

फुलापानाफळांची जी, बियांच्या आतली प्रतिमा

अरूपाच्या रुपाची 'बी', उरी उगवेन मी केव्हा?

    

कधीचा झोपलो आहे इथे गुंगीत मायावी

भवाच्या मोहनिद्रेतून या जागेन मी केव्हा?

भ्रमाचा भोपळा नाही जरी आकार विश्वाचा

निराकारात ब्रह्माच्या तुला गवसेन मी केव्हा?

                         - अभिजीत काळे.

                         १७ डिसेंबर २०१९