निर्वैर

***

मी चांगल्यांचे चांगले ते घेत आहे  

मी चांगल्याला चांगले ते देत आहे  

अंतर्मनी माझ्या नसे वाईट काही

मी सत्पथावर आखल्या रेषेत आहे  

ना बाटवू शकला मला विद्रोह त्यांचा  

ज्ञानीजनांच्या दिव्य मी छायेत आहे 

वाटा विरोधी माणसांच्या वेगळाल्या 

आनंदमय माझ्याच मी मज्जेत आहे

विसरून ते नीतीनियम जगतात जीवन 

मी कृष्ण बुद्धाच्या जुळ्या कक्षेत आहे

ना अडकलो बेड्यांमधे प्रश्नोत्तरांच्या 

एकेक उत्तर अनुभवत रेघेत आहे 

जो तर्कसंगत वाटला नाही मला तो   

माझा विषय त्यांच्या अजुन चर्चेत आहे

प्रत्येकजण धर्मास मानी श्रेष्ठ अपुल्या

वरवर दिसो निरपेक्षता संकेत आहे

आयुष्य जर निर्वैर व्हावे वाटते तर

करुणा दया अन् बंधुता अभिप्रेत आहे

                          - अभिजीत काळे.

                             ४ मार्च २०२०.