***
पाणावताच डोळे येतो म्हणून जातो
'भेटायचे पुन्हा' मी निश्चय करून जातो
बघतो वळून मागे, ओल्या क्षणातले मन
माझा मला नव्याने मी आकळून जातो
डोळ्यांत काय जादू त्याच्या कसे कळावे
नजरानजर घडे तो क्षण लाजवून जातो
म्हणतो मला शहाणा, माझाच आरसा मी
माझ्यातलाच कोणी मज वापरून जातो
आयुष्य भिक्षुकाची कफनी असेल बहुदा
प्रत्येक दिन नव्याने ठिगळे शिवून जातो
ग्रहणात ग्रासण्याची सूर्यास खंत नसते
दिपवून विश्वदृष्टी तो लखलखून जातो
माझी तुझी तशीही ओळख नवीन आहे
भलता नको उमाळा मी अवघडून जातो
- अभिजीत काळे.
९ जानेवारी २०२०.
No comments:
Post a Comment