अनावर

***

हे मना सांभाळ नाते जोडल्यानंतर.. 

व्यर्थ शिवणे एकदा ते फाटल्यानंतर.

कुंडली ठेऊ नका कोणापुढे केव्हा..

चांगले-वाईट ठरते मांडल्यानंतर.

चौघडा-सनई नका हो वाजवू लवकर.. 

वाजते आयुष्य दोन्ही वाजल्यानंतर. 

द्रव्य अथवा द्रव असो सांडायचे नाही.. 

 वेचणे जमले कुणाला..? सांडल्यानंतर. 

केवड्याने वार केला मोगर्‍यावरती.. 

कर्दळीने गंधगाथा गायल्यानंतर!

पाहतो आहेस तू रोखून का शिखरा?

संपते स्वारस्य; माथा गाठल्यानंतर.

खुळखुळत हाती असावा नेहमी पैसा..

ओळखी मिटतात नोटा संपल्यानंतर. 

रामही फसला म्हणे कांचनमृगाला त्या!

बायको हट्टास नाहक पेटल्यानंतर.

एकटा आहे जरी मी..  ते बरे आहे. 

एकटेपण फार छळते.. गाजल्यानंतर.

कोण थांबवणार मग घटनेस घडणार्‍या?

सावळ्या प्रेमात दोघे.. गुंतल्यानंतर. 

मी किती होतो अनावर.. त्या क्षणासाठी

भेट पहिली संपली! ती.. लाजल्यानंतर. 

                              - अभिजीत काळे.

                             २८ सप्टेंबर २०१९.