***
चांगले वागायचेपण जाणतो मी... चांगले!
वागलो जेंव्हा तसे... माझ्यावरी ते शेकले.
उसवला एकेक टाका... संपले नाते पुढे.
वांझ चर्चा चावडीवर फाडले की फाटले?
पोळली गेली कितीदा अन् कितीदा चावली.
संपले नाहीत अजुनी... या जिभेचे चोचले.
"जे मला नाही मिळाले, मी तुला देईल ते."
पालकांच्या या कृतीने वृक्ष भावी खुंटले.
कोणते संस्कार होते मानवी त्यांच्यावरी?
अर्भकाला काल ज्यांनी उकिरड्यावर फेकले!
"पोसणारा कोण आहे?" कमवणारा बोलला.
कमवणार्‍याला कळेना, त्यास कोणी पोसले.
झाकली गेली फुले... पण गंध नाही कोंडला.
आज त्यांच्या अत्तराने श्वास माझे कोंडले.
पेटता अंधार जळते चांगलेही त्या सवे.
घासता फांदीस फांदी.. खाक होती जंगले.
गंधवेडाने चिरडल्या जर कुणी कोमल कळ्या.
छळ किती करतील त्याचा मग सुगंधी पावले?
- अभिजीत काळे.
२४ जुलै २०१९.
No comments:
Post a Comment