कापसा

***

कुणाला काय सांगू मी कसा आहे कसा होतो?

जराही बदललो नाही जसा आहे तसा होतो?

कितीही कोसळो श्रावण, कितीही आदळो लाटा. 

भुईची धग सरत नाही नव्याने वाफसा होतो. 

गटांच्या राजनीतीचे कुठेही एकमत नाही. 

तरी एकत्र असण्याचा दिखावा छानसा होतो. 

तिच्या आकाश स्वप्नांचे कधी कळणार का त्याला?

तिच्या मार्गातला काटा कसा तो माणसा होतो.

इथे जे वागता तुम्ही तसे येणार वाट्याला. 

खरोखर आपले आपण स्वतःचा आरसा होतो. 

उडा, आकाश हे अवघे तुम्हाला मोकळे आहे. 

इथे जळतात जे केवळ अशांचा कोळसा होतो. 

हृदय माझेच हे किंवा? मला हा प्रश्न का छळतो?

कधी हळवा, मुलायम मी तुझ्यासम कापसा होतो. 

                                         - अभिजीत काळे.

                                         ४ जानेवारी २०२०.