***
माती, पाणी, चाक नि मडके एकसामाईक चलच्चित्र हे
पडणे, झडणे, घडत रहाणे, जीवन म्हणजे बदल गड्या रे!
क्षण एखादा अवचित येतो नवीन काही धडा शिकवितो
अज्ञानाची आपआपल्या ओळख पुन्हा घडवून जातो
नव्या ऋतूला जाणत जाता आनंदाचे होते गाणे
पडणे, झडणे, घडत रहाणे, जीवन म्हणजे बदल गड्या रे!
मृत्यूसंगे दोन हात कर शीर घेउनी तळहातावर
केविलवाणे मरण नको ते जगण्याच्या हव्यासाखातर
लाचारीचे नकोच जीवन असते नसणे असूनही जे
पडणे, झडणे, घडत रहाणे, जीवन म्हणजे बदल गड्या रे!
अफाट आहे अजून शिल्लक जे जे येते स्वीकारत जा
चेतास्फूर्ती मतीस देण्या तू बंध नव्याने सांधत जा
झडलेल्यांना अर्पून तर्पण नवांकुरांना जागा दे रे
पडणे, झडणे, घडत रहाणे, जीवन म्हणजे बदल गड्या रे
~ शारदात्मज.
No comments:
Post a Comment