साखर

***

तिच्या नजरेतली भाषा लपत नाही

लिपी शब्दांत डोळ्यांची कळत नाही

शहाण्याचे असावे वेगळेपण हे,

कळत नाही असे तो दाखवत नाही

उद्या जिंकेल गोगलगायही स्पर्धा

ससा जोवर हुशारीने पळत नाही

खरे का बोललेली ती मला तेव्हा,

'अरे! तू कोण माझा? आठवत नाही.'

हृदय फाटूनही जगलोच ना आम्ही?

इथे कोणी कुणावाचुन मरत नाही!

नको लपवूस चर्या ओढणीमध्ये

मनीषा चंद्र बघण्याची फळत नाही

किती ओठांत साखर पेरली आहे!

तिच्या शब्दांतली गोडी सरत नाही!

 

                    ~  अभिजीत काळे.

                       २१ मार्च २०२२