शंका

***

ठेवू नकाच बाकी फेडायला पुढे

होती तिचेच काटे टोचायला पुढे

जोखून बोल मित्रा तू बोल आपले

जड शब्द होत जातो राखायला पुढे

केलीस तू मशागत तण वाढण्यास जर

सोने मिळेल का मग वेचायला पुढे?

लाक्षागृहात इंधन लपवून ठेवता  

ठिणगीच खूप होते जाळायला पुढे

लादून घेत जाता मृदुकोवळी उन्हे

होतील तीच मोठी पोळायला पुढे

तथ्यांशहीन असते जी साक्ष बेगडी

खोट्यास साथ देते जिंकायला पुढे

घेऊ नकोस शंका कोणावरी मना!

कारण मिळेल नाते तोडायला पुढे

                    ~ अभिजीत काळे.

                         ७ मार्च २०२२