***
भावनांचे बांध फुटले ती जशी सोडून गेली
काळजाचे गीत रडले ती जशी सोडून गेली
भेटलो जेव्हा तिला मी, ओळखत नव्हतो सुखांना
ते सुखांचे ओघ सरले ती जशी सोडून गेली
चार दिवसांचे उणे जे लाभले आयुष्य आहे
त्यातलेही दोन अडले ती जशी सोडून गेली
आवडीने गात होतो जीवनाचे गोड गाणे
दुःख त्यालाही लगडले ती जशी सोडून गेली
रंगगंधांनी फुलांनी डवरलेले झाड होतो
रंग झडले गंध विरले ती जशी सोडून गेली
गलबताला ना किनारा, ना शिडावर स्वार वारा
जग-दिशा सारे हरवले ती जशी सोडून गेली
भोवताली आज अगणित माणसे ही सांत्वनाला
आपले कोणी न उरले ती जशी सोडून गेली
~ अभिजीत काळे.
No comments:
Post a Comment