इच्छा

***

उंचवर ज्याला गवसणी घालण्या उडतात इच्छा

अंबराला त्या, स्वतःच्या खूपशा असतात इच्छा

भेटण्यापूर्वी उगाचच रात्रभर छळतात इच्छा  

भेटल्यावरती अधाशी अंगभर मळतात इच्छा

त्या उद्याच्या भरवश्यावर रोज माझा आज सरतो,

वाटते आश्चर्य याचे! पण कुठे सरतात इच्छा?

ज्या कधी नव्हत्याच माझ्या वा कधी नसतात माझ्या

पाहता माझ्याकडे तू, खोल त्या रुततात इच्छा?

एक इच्छा दोन इच्छा साचती कित्येक इच्छा !

देह जळतो हा अखेरी पण कुठे जळतात इच्छा?

आठवण येते तुझी अन् मी तुझ्या स्वप्नात रमतो

फक्त स्वप्नालाच ठाउक काय त्या असतात इच्छा

जन्मभर माणूस त्यांना नाइलाजाने दडवतो

जीव जाताना मनाला खोलवर खुपतात इच्छा

एक गाठोडे तळाशी ठेवते बांधून सरिता   

वाळल्या पात्रात 'नाचिज़' कोवळ्या सुकतात इच्छा

                                          ~ अभिजीत काळे.