***
निर्णयाला वाटते की मी कुठे चुकलोच नाही
ठाम! त्याला वाटते की मी कुठे चुकलोच नाही
चांगले दिसणार नाही चांगल्या गोष्टींत त्याला
दुर्जनाला वाटते की मी कुठे चुकलोच नाही
लावली कळ शांततेला, भांडणाला तोच कारण
अन् खळाला वाटते की मी कुठे चुकलोच नाही
हा चुकीचा, तोच चुकला, दोष सार्‍यांचेच दिसले
चूक', ज्याला वाटते की मी कुठे चुकलोच नाही
"होय मी चुकलोय" म्हटलो, चूक दाखवलीस तेव्हा
पण, मनाला वाटते की मी कुठे चुकलोच नाही
'वाकडी असतील पडली पावले, आहे सरळ मी'
वाकड्याला वाटते की मी कुठे चुकलोच नाही
तोच प्रामाणिक नसावा आपल्या अंतर्मनाशी
ज्या कुणाला वाटते की मी कुठे चुकलोच नाही
~ अभिजीत काळे.
No comments:
Post a Comment