***
कारण होती जी स्वप्नाला तुझी आठवण
हल्ली नाही छळत मन‍ाल‍ा तुझी आठवण
वर्तमान मी जगतो आहे आनंदाने
दुधात विरजण हवी कशाला तुझी आठवण
अंथरल्या मी पायघड्याही असत्या तेव्हा
अता बोचते या हृदयाला तुझी आठवण
विसरलीस तू गजरा तो मी तुला माळला
अजूनही त्या गंधक्षणाला तुझी आठवण
झाडे, वेली, पायवाट अन् कड्याकपारी
अजून होते सिंहगडाला तुझी आठवण
जुन्य‍ा वहीच्या पानांमधल्या स्मृती उघडते
पुनीत करते या देहाला तुझी आठवण
अगाध आहे ह्या काळाचा महिमा केवळ
नंतर येते सांग कुणाला तुझी आठवण?
~ अभिजीत काळे.
१३ जुलै २०२१.
No comments:
Post a Comment