सहोदर

***

किंमत जरी न त्याला खात्यात जीवनाच्या

पैसाच राज्य करतो खेळात जीवनाच्या

संयम, प्रकाश अपुरे वेगापुढे मनाच्या

अन् बंदिवान मन ते जाळ्यात जीवनाच्या

स्वातंत्र्य वासनांना देताच माणसाने

घडल्या कथा हजारो कुख्यात जीवनाच्या

शरपंजरी सुखाची आरास मांडण्याला

निष्ठूर तीर काही भात्यात जीवनाच्या

आधार ते सुखाचा होतील सांजवेळी

क्षण साठवत रहावे ओच्यात जीवनाच्या

जोवर सुपात तोवर नाचत रहा खुळ्यांनो

होणार पीठ शेवट जात्यात जीवनाच्या

आयुष्य फार थोडे, स्वप्ने अनंत आशा

सगळे कसे बसावे साच्यात जीवनाच्या

अंतीम श्वास ठरतो देऊन शांत निद्र‍ा   

मृत्यू खरा सहोदर नात्यात जीवनाच्या

                            - अभिजीत काळे.

                           २१ नोव्हेंबर २०२०.