दुःख पुरे छळवाद पुरे वनवास नको नशिबात पुरे
वाजत गाजत ये सुखदे उपवास पुरे उपहास पुरे
जीवन कानन कैद जणू अपराध कळे नच काय असे
येइल जाग उद्या अथवा घडणार पुढे कळणार कसे
कर्मकथा अभिभाव व्यथा इतुक्यात इथे विपदा न सरे
नाचत खेळत ये सुखदे उपवास पुरे उपहास पुरे
मानस सारस हंस मना मधुपा तृषिता षटपाद मना
लोभ उरी धरतोस कसा तितकेच मिळे जितका भरणा
भ्रामक पारद जीवन हे गवसे न कधी चिमटीत पुरे
हासत हासत ये सुखदे उपवास पुरे उपहास पुरे
शारद सुंदर मृण्मय तू मनभावन पावन तू शुभदे
धुंदित गंधित जीवन दे जनमंगलकारक आशिष दे
चिन्मय शाश्वत दुःखहरे वरदायक कामद मोक्षकरे
नंदित मोदित ये सुखदे उपवास पुरे उपहास पुरे
- अभिजीत काळे
#गोदातीर्थ_काव्यसाधक.
No comments:
Post a Comment