ध्येय

***

कल्पनेने मारल्या मजला म्हणू

खेळ शब्दांचा तरी, गझला म्हणू

देह झिजवावा असा संकेत जर

कोणत्या कर्मात तो झिजला म्हणू?

पावसाळी मेघ आला आडवा

तेवढ्याने सूर्य का विझला म्हणू?

कागदाला रंग शाईचा जरी

भावनांनी तो असे भिजला म्हणू

अर्थ कळला तर बरे म्हण अन्यथा

शेर जमला तो कुठे? फसला म्हणू

वाद नाही, बोलणी, मसलत म्हणू

फार तर संवाद फिसकटला म्हणू

चालणारा ध्येय अंतिम गाठतो.

संपला! आधीच जो बसला, म्हणू

                    ~ अभिजीत काळे.