निःसंग

***

मन हरवते कुठे शोधता येत नाही

विश्व देहासवे लांघता येत नाही

जीवनी एकदा चांगली वेळ येते  

वेळ नक्की तिची सांगता येत नाही

वाट चालायला मी निघालो, समजले

वाट वाटेसही सोडता येत नाही

काळओघ‍ामधे सांडलेल्या क्षणांना 

जात मागे पुन्हा वेचता येत नाही

माणसे फाटकी पण मने मात्र मोठी

आज कोणास हे पाहता येत नाही

लाज नाहीच माझ्या मला वागण्याची

स्वार्थ कोणासही त्यागता येत नाही

कोणती अर्जुना प्राप्त केलीस सिद्धी

लक्ष्य बाणास की चुकवता येत नाही

जीवना सोबतीला तुझ्या नित्य मृत्यू 

वेळ ज्या नेमली खोडता येत नाही

(फ‍ार इतकी नसावी जखम खोल माझी)

काय भरली असावी जखम खोल माझी

सांत्वनाला कुणी 'जाणता' येत नाही

ही प्रवाशा तुला वाट काट्यात नेते

अन् तुला नीटसे चालता येत नाही

वाटते देह टाकून निःसंग व्हावे

वेष हा मोहमय सांडता येत नाही

                      - अभिजीत काळे.

                     २ ऑक्टोबर २०२०.