सावली

***

तिचे रागावणे सुद्धा महत्त्वाचे

तिचे रागावणे जर प्रेम टोकाचे

पुढे घडणार हे माहीत असते पण,

कुठे पक्के असे अंदाज कोणाचे?

हमी देतोस तू सर्रास सगळ्यांना

नपेक्षा राख अपुल्या मोल शब्दाचे

प्रयाणाची अगाऊ सूचना नाही

किती आधांतरी जगणे मनुष्याचे

 

इथे निर्वस्त्र येणे आणि जाणे हे

तुझ्या सांगून जाते मूल्य वस्त्राचे

कधी ते झोंबते तर लाभ कोणाला

गणित कळले कुणाला सांग नशिबाचे 

कुणाचे भागते चमचाभरानेही

कुठे रांजण कमी पडतात सौख्याचे

स्वतःची मांडली आहेस पूजा तू

तुला मग वावडे असणार सत्याचे

जिथे चोहीकडे दिसतात हमरस्ते

तिथे नाही खरे भवितव्य स्वप्नाचे

कड्या-कुलपे असो वा कोट तटबंद्या

कुठुनही पाखरू उडतेच प्राणाचे

तुझी जी सावली दिसते तुला आहे

तिला अस्तित्व म्हण केवळ प्रकाशाचे

                       ~ अभिजीत काळे.

                        १५ ऑगस्ट २०२१.