क्षर

***

एकावरती एक कधी का स्थिर राहतील थर वाळूचे ?

लेच्यापेच्या विश्वासाचे ढासळेल की घर वाळूचे..

इच्छाशक्ती असता जमते पांगळ्यासही पर्वत चढणे,

कशी भरारी जमेल सांगा असता तुमचे पर वाळूचे..

मृगजळ म्हणजे पाणी नाही तहान कुठुनी भागवेल ते,

पिकास नाही देत उभारी भुसभुशीत खाचर व‍ाळूचे..

आयुष्याच्या शाळेमध्ये लाख परीक्षा नशीब घेते,

हरतो येथे जो जो त्याचे हृदय म्हणू कातर वाळूचे..

गडकोटांची जरी शिबंदी रक्षण तुमचे करण्यासाठी,

वाचवेल पण कोण तुम्हाला असाल पुतळे जर वाळूचे..

गळे तेलही रगडल्यावरी प्रयत्नपूर्वक कण वाळूचे,

अशक्य जीवन जाण सर्वथा तुझेच जरका कर वाळूचे..

कैवल्याचा स्पर्श असुनही चंचल मन अन् शरीर असते,

नश्वरतेने शापित आहे पार्थिव इथले क्षर वाळूचे..

                                                 ~  अभिजीत काळे.

                                                     २७ जुलै २०२१.