***
शब्दांत सापडेना वात्सल्य रूप आई
व्यापून अंबराला उरली तिची निळाई
विश्वात सानुल्यांच्या आईच सर्वकाही
आई शिवाय नाही त्यांची दुजी विठाई
उदरात काळजीने नवमास गर्भ वाही
पुण्यास माप नाही इतकी तिची भलाई
पत्नी, बहीण, कन्या नाना रुपे जरी ती
होऊन 'माय' झिजली प्रत्येक जन्म बाई
अध्यात्म, धर्म, नीती चरणी तुझ्याच मुक्ती
तू माउली, तुकाई, एका, जना, जिजाई.
ब्रह्मांड अंतराळी मायेमुळे तरंगे
अवघी गुरुत्व शक्ती, दुग्धामधील साई.
पृथ्वीवरील सगळ्या नात्यांतली मलाई
भरलीय ज्यात, 'ना-ते'.. ते एक फक्त आई.
- अभिजीत काळे.
९ मे २०२१.
No comments:
Post a Comment