***
उपभोगाच्या रस्त्यांवर जन्मांची उतरण आहे
कर्मविपाकी जलधारांनी प्राक्तन सरिता वाहे
नकळत भरते चिंध्यानी जे आणिक भरतच जाते
ना सुटणार्‍या पक्क्या गाठींच्या इच्छांचे हे गाठोडे
कलश तृषेचा भरतच नाही सुखे कितीही ओता
थकून जातो उरात वायू भरणारा मग भाता
मातीचा घट पुन्हा मिसळतो फुटून मातीमध्ये
ना सुटणार्‍या पक्क्या गाठींच्या इच्छांचे हे गाठोडे
डोळ्यांच्या निस्तेज बाहुल्या रंगहीन मुखम्लान
चैतन्याच्या गावी जातो देह टाकुनी प्राण
संपत नाही आस जिण्याची जरी थांबले श्वास
ना सुटणार्‍या पक्क्या गाठींच्या इच्छांचे हे गाठोडे
ऋणानुबंधासाठी इथल्या पुन्हापुन्हा मी येतो
जातीसाठी माती खातो मातीमध्ये मिळतो
आकाशाने मातीशी बांधले सनातन नाते
ना सुटणार्‍या पक्क्या गाठींच्या इच्छांचे हे गाठोडे
- अभिजीत काळे.
२४ जून २०२१
No comments:
Post a Comment