***
तुला पाहून खूप दिवस झाले.
तुझ्या वाचून खूप दिवस झाले.
अता होणार काय कुणाचा मी?
तुझा होऊन खूप दिवस झाले.
जुने आभाळ, बाक, फळा, शाळा,
जुने हरवून खूप दिवस झाले.
सुखांचा रंग आज फिका झाला.
सुखे विसरून खूप दिवस झाले.
दिले मी शेवटास तुला सगळे
खिसे फाटून खूप दिवस झाले.
तिच्या रजनीत माळ सुमन चंद्रा
पुनव संपून खूप दिवस झाले.
मनाच्या आत बंद मनाचे मन,
बघू उघडून, खूप दिवस झाले!
नभाला बाप माय भुई म्हणतो.
घरी जाऊन खूप दिवस झाले.
रडू येणार काय कुणासाठी?
नदी आटून खूप दिवस झाले.
- अभिजीत काळे.
१७ नोव्हेंबर २०१८.
No comments:
Post a Comment