***
आयुष्याची वाट चालतो चणचण संपत नाही
तनामनाची भूक वाढते 'मी'पण भागत नाही
दोन वेळचे अन्न मिळावे माफक ज्यांची आशा
घरात त्यांच्या माणुस जळतो, सरपण पेटत नाही
आभाळाचा देव ओढतो तप्त कोरडे पाठी
पाण्यासाठी बाई फिरते वणवण थांबत नाही
वर्षांमागुन वर्षे जाती कळावयाला जीवन
कळते ज्याला अमूल्य किंमत तो 'क्षण' सांडत नाही
पोटासाठी रस्त्यावरती गाडा ओढत असता
अनवाणी पायांना रस्त्याचे रण पोळत नाही
रोग 'विकृती' मनास ज्यांच्या औषध कुठले त्यांना
सभ्यपणाचे गोडगोमटे 'लक्षण' शोभत नाही
बाप झगडतो परिस्थितीशी माय काढते खस्ता
संसाराला सांधत असता अडचण वाटत नाही
पत अब्रूचे मोलच आता उरले नाही त्यांना
कर्ज अवास्तव घेउन पळती दडपण वाढत नाही
"कर्णफुलांची ओळख नाही, पैंजण मी ओळखतो"
आजकालच्या सीतेला तो लक्ष्मण भेटत नाही
- अभिजीत काळे.
२२ एप्रिल २०१८.
No comments:
Post a Comment