***
अर्ध्यात भंगलेल्या स्वप्नास सल विचारू!
डोळ्यांत साठलेल्या पाण्यास सल विचारू!
जीवन सरून गेले लढण्यात प्राक्तनाशी.
दुर्दैव झेललेल्या जगण्यास सल विचारू!
न्यायालयात सडला दावा पिढ्यापिढ्यांचा
वैरात पेटलेल्या नात्यास सल विचारू!
फसव्या प्रलोभनांचे मोहक किती पिसारे.
चकव्यात गुंतलेल्या तरुणास सल विचारू!
छळतेय माणसाला त्याची कशी प्रजाती?
कष्टांत गांजलेल्या गरिबास सल विचारू!
बेधुंद अत्तराच्या गंधात नाहताना,
सर्वस्व वाहिलेल्या पुष्पास सल विचारू!
माजात नाचण्यातच तारुण्य व्यर्थ गेले.
आयुष्य सांडलेल्या वृद्धास सल विचारू!
गेली जरी कितीही मोठ्या घरात मुलगी,
काळीज फाटलेल्या बापास सल विचारू!
स्वातंत्र्य लाभले पण किंमत कुणास त्याची?
प्राणास वेचलेल्या शहिदास सल विचारू!
आवर्षणे भलेही झेलेल ते खुशीने,
मालक गमावलेल्या शेतास सल विचारू!
भांगामधील कुंकू पुरले न जीवनाला,
सौभाग्य संपलेल्या भाळास सल विचारू!
मातापित्याविना जे जगते अनाथ जीवन,
वात्सल्य हरवलेल्या बाळास सल विचारू!
सत्ता, जमीन, खुर्ची, वाडा, रुढी, घराणे.
निर्वंश जाहलेल्या रुधिरास सल विचारू!
- अभिजीत काळे.
- २८ मार्च २०१९.
No comments:
Post a Comment