जाचत आहे

***

जिवलग नाही माझे कोणी सांगत आहे 

सूर्याचाही जीव पोळला वाटत आहे

लागत नाही डोळा हल्ली रात्री सुद्धा

मी दुःखाला दुःख कुणाला भोगत आहे?

                          

 

अर्ध्यामुर्ध्या हळकुंडाने पिवळे झाले

सोने देखिल त्यांना क्षुल्लक भासत आहे

 

घर चौघांचे चौकोनी हे असून चौरस 

जो तो त्याची वाट वेगळी चालत आहे

जात धर्म वा समानता वर-वरचे मुद्दे

आग नेहमी कोण इथे ही लावत आहे

माझे मीपण मोठे आहे तुझ्याहूनही

जो तो त्याच्या गल्लीमध्ये भुंकत आहे

ओली सुक्की खेळत खेळत मोठे झालो

दैव अजुनही..तोच खेळ का खेळत आहे

पृथ्वीभवती चंद्रासंगे मीही फिरतो

ठरली कक्षा कोण इथे ओलांडत आहे?

नीती तत्त्वे बंद चौकटी आणिक भिंती 

स्वैर मनाला वेसण भलती जाचत आहे

                         - अभिजीत काळे.

                            १ जुलै २०१८.