***
प्रत्येक शब्द मात्रा तोलून पाजणारी
गेली कुठे दवा ती माणूस जोडणारी
धरतात तेच येथे उचलून लोकशाही?
ज्यांना मते मिळाली दारूत लोळणारी
शोधावयास आता नाही कुठेच उरली
लाजून हासणारी अन् इश्श्य बोलणारी
त्यागून सर्व किंतू आनंद वेचणारी
मी पाहिलीत हृदये वारीत चालणारी
जनुकीय पीळ ज्यांच्या पेशींमधे पिढ्यांचा
अद्भुत रसायने ही माणूस वाटणारी
आता न सापडावी शोधून औषधाला
शहरात माणसे ती गावात भेटणारी
शोधू कुठे अता मी डंखासवे मधाला
ती मोहळे सुहृदयी हितगूज साधणारी
- आभिजीत काळे
१९ मार्च २०१७.
No comments:
Post a Comment