बघतो आहे

***

मी म्हणणारे संपुन गेले बघतो आहे

रांगेत  उभे अन् उरलेले बघतो आहे

ज्या प्रश्नाने अवघड केले जगणे त्याचे

उत्तर कोणी चोरुन नेले बघतो अाहे

सत्य अहिंसा निष्ठा केवळ शब्दच पोकळ

बेवारस रस्त्यावर मेले बघतो आहे

काळ बदलला पोषाखांचे रूप बदलले

खुंटीवरती जुनाट शेले बघतो आहे

गुणहीनांचे कौतुक होते ज्ञानी मुकती

विकत भेटती येथे चेले बघतो अाहे

नावापुरत्या मंदिर मशिदी, देव हरवला

धर्माचे मी घाउक ठेले बघतो अाहे

पाचोळ्याला जाळुन गेली आग तरी मी

राखेमध्ये नवीन झेले बघतो आहे

काळोखाचे मनही काळे असते म्हणती

मी प्राचीला स्वप्न उदेले बघतो अाहे

जमले नाही स्वत्व शोधणे, उगाच फिरती

आले गेले सकाम हेले बघतो अाहे

                   -अभिजीत काळे.

                     ४ मार्च २०१८.