शब्दांनी कवितेला स्पर्श केला कवितेने चंद्राला.........
***
क्षितिजाच्या गालावरचा मी चंद्र स्पर्शिला होता
नवतीच्या भाळावरचा मी चंद्र स्पर्शिला होता
एकांती अनुभवताना अलवार रुपेरी किरणे
चंदेरी माळावरचा मी चंद्र स्पर्शिला होता
खुलवीत अर्थ सौख्याचे नाचले शब्द कवितेचे
प्रीतीच्या वर्खावरचा मी चंद्र स्पर्शिला होता
भाराने दवबिंदूंच्या प्राजक्तसडे कोसळता
दहिवरल्या पानावरचा मी चंद्र स्पर्शिला होता
मन मनात गुंतत जाता नभ मनात उतरत येता
मनिषेच्या पंखावरचा मी चंद्र स्पर्शिला होता
- अभिजीत काळे.
२३ मार्च २०१९.
No comments:
Post a Comment