***
हसतात स्वप्ने, फसतात स्वप्ने,
स्वप्नात स्वप्ने बघतात स्वप्ने.
प्रेमात वेड्या पडतात स्वप्ने.
मोहक भ्रमावर जडतात स्वप्ने.
आळस किती तो? निजतात स्वप्ने.
चिडताच आई; उठतात स्वप्ने.
सामर्थ्य दुबळ्या पंखात भरुनी,
गगनी यशाच्या उडतात स्वप्ने.
वेड्या मनाला लावून आशा,
विपरीत शेवट करतात स्वप्ने.
रात्रंदिवस जो स्वप्नात रमतो,
डोक्यात त्याच्या सडतात स्वप्ने.
पाहून स्वप्ने, पाऊल मागे,
त्यांचीच केवळ विरतात स्वप्ने.
फांदीवरी जो एका न राही,
त्या मर्कटाला नडतात स्वप्ने.
अडतात स्वप्ने वाटेत अर्ध्या,
तेव्हा खरोखर रडतात स्वप्ने.
श्वासात निष्ठा ध्यासात उर्जा
धरता, धरेवर फळतात स्वप्ने.
कोणी ललाटी नाहीच लिहिली.
आधीच ठरली नसतात स्वप्ने.
दारात संधी येताच पकडा,
नसता पुढे मग.. पळतात स्वप्ने.
आयुष्य देता ओवाळणीला,
सर्वांगसुंदर घडतात स्वप्ने.
- अभीजीत काळे.
३१ जानेवारी २०१९.
No comments:
Post a Comment