आर्त खोल शांततेत पान्हवते मन माझे
आजकाल एकांती पालवते मन माझे
फिरणार्या पंख्याला लाजवते मन माझे
मोहाचे वादळ की माजवते मन माझे
आसर्यास घरट्याच्या शांत झोप घेता मी,
स्वप्नांचे इमले मज दाखवते मन माझे.
भजनांच्या प्रासादिक सोहळ्यात मी रमतो
अन मलाच वासनेत रंगवते मन माझे
असतो पण नसतो मी, नसताना असतो मी,
सत्य एक, वेगळेच भासवते, मन माझे
सोंग करत थकतो मी, थकते ना हे केव्हा,
माझ्यातच मी दुसरा नांदवते मन माझे
माझ्यातच असते अन माझेही असुनी ते,
हुकुमत की माझ्यावर गाजवते मन माझे!
केतकीस शोधण्यात पारंगत भ्रमरासम
मनकवडे, अंतरंग ओळखते मन माझे
हीच एक अपवादी घटना मी अनुभवतो
फक्त तुझ्या साठी हे नादवते मन माझे
- अभिजीत काळे.
२८ मार्च २०१८.
No comments:
Post a Comment