***
तिथे त्या अंत्ययात्रेला विरक्ती देहभर फिरली
स्मशानाची हवा सरता मनाने 'का'मना वरली
तिच्या पासून अश्रूंना लपवण्याचे कसब अवघड
जराशी दूर जाता ती दवाने लोचने भरली
उकळते वेदना कसली जलाची वाफ होताना ?
बुडाशी आग पाण्याच्या उभ्या दाव्यात सरसरली
उन्हाने होरपळ केली जिच्या माझी कधीकाळी
तिच्यावर ऊन आढळता, जरा मी सावली धरली.
तुडवला मी चुकुन चाफा मनाला दु:ख झाले पण
नवल त्याचे किती सांगू उभय तळवीच अत्तरली
'तसा' नव्हताच माझाही तिला भेटायचा हेतू
कशाने एवढी मग ती मला बघताच बावरली
जरी नाही अता रावण जरी तो कंसही नाही
नराधम आजचे बघुनी धरा अवघीच थरथरली
- अभिजीत काळे.
१९ एप्रिल २०१८.
No comments:
Post a Comment