शुद्धता

***

शुद्धता पापी मना गंगेत नाही!

पाप विरघळते, 'खरा' संकेत नाही!

बी-बियाणे, खर्च, किंमत, पीकपाणी.

भाव मिळता, फास मग तो घेत नाही.

केवढा केलास गोळा स्वार्थ निष्फळ

येथुनी कोणीच काही नेत नाही.

गूढ, मायाजाल, गर्ता, ब्लॅक मॅजिक.

जो तुझ्या डोळ्यांत बुडला; येत नाही !

मूल्य मी शिकलोय जेथे जीवनाचे

ते मिळत का आज त्या शाळेत नाही?

टोमणे, खिल्ली उडवणे, मानहानी

हे बरे की... मी तिथे चर्चेत नाही!

जाळता काटे, सवे जळती फुलेही

आळ सूर्यावर कुणी का घेत नाही?

चोच, दाणे, पोटपाणी, चार पैसे

कोण सांगा ना इथे चिंतेत नाही?

ये कधीही; भेट घे बिनधास्त मित्रा

ठरवुनी जमणार कुठला बेत नाही!

                      - अभिजीत काळे.

                        १० जून २०१९.