वेळ

या गाडीने मला यायचे सांगत थोडी बसते ?

वेळ कधी का येण्या आधी मुहूर्त कुठला बघते?

कराल गंमत, बसाल भोगत, कर्माचे फळ तुमच्या. 

मिटून डोळे रहा तुम्ही वा करा फुकाच्या गमजा

बगळ्यासम ती ध्यान लावुनी सावज हेरत असते.

वेळ कधी का येण्या आधी मुहूर्त कुठला बघते?

अडवायाला तिला कुणाची माय व्यायली आहे.

तिच्या आखल्या रस्त्यावरती प्रवास तुमचा आहे.

तळहाताच्या रेघेलाही हसून नियती डसते.

वेळ कधी का येण्या आधी मुहूर्त कुठला बघते?

जीवनगाणे, रडगाणे वा आनंदाचे गाणे

गात रहावे कुणास चुकले येणे आणिक जाणे.

आयुष्याच्या सोबत गाणे हसते अथवा रडते.

वेळ कधी का येण्या आधी मुहूर्त कुठला बघते?

गांभिर्याने पहाल तर हे कळून येते जीवन

कुठे कुंजवन, कुठे तपोवन, मरुस्थळी वा वणवण.

आयुष्याला सुखद अचानक क्षण ती बहाल करते.

वेळ कधी का येण्या आधी मुहूर्त कुठला बघते?

कर्मफळांचे गणित सुटले कुणास केंव्हा सांगा?

वाटेवरती सोप्यासुद्धा अवचित येतो खड्डा 

ज्याचे त्याचे संचित सगळा हिशोब ठेवत असते. 

वेळ कधी का येण्या आधी मुहूर्त कुठला बघते?

                                     - अभिजीत काळे.

                                    १२ डिसेंबर २०१९.