भोपळा

***

कुणाच्या सारखा नाही, जरा मी वेगळा आहे. 

खुळ्या छायेत रमलेला उन्हाचा सोहळा आहे.

मला नाही तिची चिंता तरी माझ्या सवे असते.

कळे ना सावलीला या कसा माझा लळा आहे?

जिवाचे पाखरू उडुनी नभाच्या पार गेल्य‍ावर!

कुणाचे पोट भरतो हा विधीचा कावळ‍ा आहे?

दिले स्वातंत्र्य घटनेने तुला सत्ता निवडण्याचे.

तुझ्या हातामधे मित्रा तुझा आता गळा आहे.

               

तृषेने ओठ आक्रसले, भुकेने पोट आकसले.

पितर पापी असावे का? कुपोषित कोवळा आहे!      

तुझे हे तोकडे कपडे? किती मजबूर ही गरिबी?

कुणा अंकीत करण्य‍ाला तुझा हा सापळा आहे?

            

कुणी शास्त्रांमधे लिहिला असा हा शोध उफराटा?

कलीच्या रोखण्या नजरा छताला कोहळा आहे.

कुणी खिंडीत गाठावे, कुणी लालूच दावावी,

कुण्या गनिमास ना बधला इमानी मावळा आहे.

चढया घोड्यानिशी आला स्वराज्याला मिटवण्या जो,

शिवाने त्याच अफजुलचा उपसला कोथळा आहे.

मळे फुलवीत जा किंवा फुले तुडवीत जा लेका,

इथे प्रत्येकजण रस्ता निवडण्या मोकळा अाहे.

अनीती वाढता तुमची जरा लक्षात ठेवा हे,

करावे तेच फेडावे, विळ्यावर भोपळा आहे!

                              - अभिजीत काळे.

                            २३ जानेवारी २०१९.