***
वृत्तांत काय सांगू भेटीतला सखीच्या
केसांत मोगराही घामेजला सखीच्या
लय, ताल, काम, मदिरा काया भरून वाहे
मनमोर पैंजणाला नादावला सखीच्या
आवर म्हणून त्याला जमले न आवराया
हातातला चुडाही भांबावला सखीच्या
चंद्रास लाज आली ओशाळला मनी तो
मुखड्यास पाहताना कोमेजला सखीच्या
शृंगार साज ल्याली मोहक छबी बिलोरी
प्रेमात आरसाही आसावला सखीच्या
ओथंबली सुखाने येता मिठीत अलगद
रंध्रांमधून चाफा गंधाळला सखीच्या
गुंफण मनामनाची देहापल्याड गेली
होऊन श्वास रमलो श्वासांतला सखीच्या
- अभिजीत काळे.
१४ फेब्रुवारी २०१९.
No comments:
Post a Comment