अजून थोडी

नशा चढेना दुःख सरेना प्यावी वाटे अजून थोडी 

बेफिकिरीने मजा गझलची घ्यावी वाटे अजून थोडी

शब्द संपले श्वासांमधले संभाषण पण चालू आहे

मौनामध्ये अबोल बोली ध्यावी वाटे अजून थोडी

वाटत आलो सुखदुःखांना जन्मोजन्मी आनंदाने 

लुटून अवघी शब्द संपदा द्यावी वाटे अजून थोडी

बेहोषीचे अत्तर करते दूर मनाला मनापासुनी

अंतस्थाच्या समीप होडी न्यावी वाटे अजून थोडी

नकळत कळले कळता कळता कुठे हरवलो होतो आपण

कळलेल्याची जाणिव आता  यावी वाटे अजून थोडी

                    - अभिजीत काळे.

                  ४ ऑक्टोबर २०१७.