***
मनाचा गूढ गाभारा भरावा शून्य शब्दांनी
उगा का सोंग भक्तीचे धरावे मूढ गात्रांनी
धरू जाताच स्वप्नांना पुढे जाऊन सत्याच्या
तयांचे फोलपण कळते उन्हाच्या तीव्र चटक्यांनी
नदीच्या संथ पात्राला झर्याचे बालपण स्मरते
तसा बाष्पासवे उष्मा स्मरावा मेघमालांनी
दिव्यांनी जाळला जाता उभा अंधार रात्रीचा
इशारा समजुनी घ्यावा त्वरेने भ्याड घुबडांनी
सश्याला हरवते कासव इसापाची कथा सांगे
खरे मानू नये का हे घड्याळांच्या व्यवस्थांनी
- अभिजीत काळे.
३ डिसेंबर २०१८.
No comments:
Post a Comment