***
मी आभाळाची उर्जा घेऊन धरेवर रुजलो
उन वारा पाणी प्राशत फुललो फळलो दरवळलो
दुःख वेदना गरिबीला असह्य उपासमारीला
पाहून मनातून हाललो तळमळलो गहिवरलो
जीवनवेलीवरती नित-नूतनतेने अंकुरलो
क्षण आनंदाचे फुलवत पाखरांसवे गुणगुणलो
मी डोंगरमाथ्यावरचा गडवारा उरात भरुनी
छातीवर तटबुरुजांना मिरवीत सुखाने जगलो
संजीवक कैवल्याला देहाचे कोंदण सजवत,
शापित यक्षासम अवघ्या जन्मांचे वर्तुळ फिरलो.
मी आलो होतो केवळ शोधाया परमेशाला
सर्वात्मक तो आकळता मी रिमझिमलो परिमळलो
- अभिजीत काळे.
२६ जाने २०१९.
No comments:
Post a Comment