***
एक कर ही फाटकी झोळी तरी बदलून दे.
अन्यथा मज सांडलेले धैर्य तू बांधून दे.
उगवत्या दिवसास माझे मागणे हे नेहमी,
दोन क्षण आनंद माझ्या अंगणी आणून दे.
घोर मोठा जीवनाचा, रात्रभर मी जागतो.
हरवलेली झोप माझी तू मला शोधून दे.
पावसा परतून येणे बघ तुला जमतेय का?
ओल डोळ्यांची पुसोनी चोच ओलावून दे.
स्तब्ध येथेही हवा अन् स्तब्ध तेथेही हवा,
ऊब या श्वासांतली श्वासांत त्या मिसळून दे.
द्यायचे नाहीच जगुनी जर सुखाने जीवनी,
दुःख दे वा कष्ट जे देशील अफलातून दे.
पोचली जर प्रार्थना ही ईश्वरा कानी तुझ्या,
ज्यास जे काही हवे ते सर्व तू मिळवून दे.
- अभिजीत काळे.
२६ मे २०१९.
No comments:
Post a Comment